Интим фотоларын Инстаграмга куйган Ләйсән Басыйрова “Болгар кызлары” төркеменнән китә

Интим фотоларын Инстаграмга куйган Ләйсән Басыйрова “Болгар кызлары” төркеменнән китә
Ләйсән Басыйрова үзенең инстаграмында ваннадагы фотосессиясеннән фотолар элгән иде. Трионың продюсеры һəм солисты Айгөл Зəйнуллина "Болгар кызлары"ның Инстаграмдагы битендə тамашачылардан гафу үтенеп пост урнаштырды. Бүген төркемнең рәсми аккаунтында Ләйсән Басыйрованың фотоларына бәйле хәбәр чыкты.

"Сез кайчак күргән, өстә генә яткан әйберләр эчтә нәрсә бар икәнен күрсәтми. Булган хәл – бер ел дәверендә безнең уртак эш вакытында килеп чыккан вәзгыять. Беркем дә кешенең шәхси тормышына керми һәм эш бер фотографиядә генә түгел. Коллективта билгеле бер кагыйдәләр бар, аларны Ләйсән Басыйрова үтәмәде. Бик күп тапкырлар андый фотоларны бөтен кеше күз алдына чыгарып салмаска дигән үтенеч булды. Кешенең ни трионың җитәкчесенә, ни төркемнең тарихына, ни коллективка аз гына да хөрмәте юк.

Ләйсәннең яшәү рәвеше һәм мораль кагыйдәләре “Болгар кызлары” төркемендә эшләүгә туры килми. Без беркайчан да мөселман төркеме булмаган, без – милли коллектив, замана белән бергә барабыз, экспериментлар ясыйбыз, яңалык эзлибез, төрле юнәлешләрдә эшлибез. Шоу-бизнес үз кагыйдәләрен кертә, базар җырчылар, төркемнәр белән тулган, яшәр өчен төрле проектлар ясарга, төрле телләрдә җырларга, стереотиплардан китәргә туры килә. Әмма беркем дә безне түбән төшүдә, вульгарлыкта, пычраклыкта һ.б. гаепли алмый. Пиар! Безгә, 30 елдан артык эшләгән коллективка андый пиар кирәк түгел. Иҗат, эш, коллективның тарихы – әһәмиятле әйбер, ә “пычрак керне” чайкау түгел. Сөйләшеп утыру, комментарий язу җиңел. Проблеманың тирәнлеген белмичә торып, моны эшләргә ярамый. Ләйсән Басыйрованың китүе – коллектив карары. Ул бер елдан азрак төркемдә эшләп, сынау срогын узмады.

“Кызганыч. Триода матур күренә иде”, - дип язган бер кулланучы.