Җырчы Иркә унҗиде ел төзегән корабына утырып юлга чыгарга җыена

Ул «Иҗат» дигәне корабы турында тасвирлап язган.

Җырчы Иркә матур фотосы янына кораблары турында пост язган.

«Минем тормышымда берничә кораб бар. Корабларның исемнәре дә бар. Берсе «Иҗат» исемле. Бу корабка минем командам, җырлар, гомумән алганда, яратып эшләнгән эшем төялгән. Әнә шул корабка утырып, без кына еш зур юлларга кузгалабыз. Юлга чыкканчы мин корабны мең кат тикшерәм. Тишек-тошыклары юк микән, штурм вакытында безнең кораб нык торыр микән дип кат-кат карыйм.

Әлбәттә, зур шомлы дулкыннарсыз гына булмаганын да беләм, тик минем кораб бит 17 ел төзелде, бирешмәскә тиеш, Алла бирса. Командам башка корабларда, башка юлларда йөреп кайткан, җаен белә. Алар да сынатмас… Әле берсе пиратларның барлыгын да сөйләде. Алар күзгә чалынса, дәшми китәргә кирәк, тик шулай да корал алырга кирәк, ди.

Кыскасы, күлмәкләр тегелгән, җырлар бу сезонга тупланган, двигатель каралган, берничә кечкенә көймә алынган (күселәр булса, шунда утыртып җибәрәбез, диделәр егетләр). Без әзер, якыннарым. Сезне күрергә дип ашкынабыз, яратабыз», — дип тамашачыларга мәхәббәтен, көндәшләргә каршы торырга әзерлеген белдергән җырчы.

«Молодец та инде үзең. Синең кораб мәңге батмый, Алла бирса. Үзең дә менә дигән, командаң да шәп»;

«Хәниянең маягы гел яктыртып торыр юлыңны, чөнки егетләр бик көчле»;

«Синең кораб үргә дә бик шәп йөзә, танкер кебек каршылыкларны да ярып бара, әмма артык көчләмә, җайгарак кына йөзсен. Ярларның һәрберсенә барып җитәргә язсын»;

«Синдәге сүз байлыгы, фантазия. Шаккатабыз!»;

«Иркә, алга! Тайпылма!» — дип хуплаган аны виртуаль дуслары.