Илсөя Бәдретдинова яман шеш белән авыручы апасы катнашында клип төшергән
Җырчының «Нәрсә җитми сиңа, күңел?» дигән яңа җырының клибы чыкты.
Җырчы Илсөя Бәдретдинованың «Нәрсә җитми сиңа, күңел?» дигән яңа җырының клибы чыкты. Анда җырчының яман шеш белән авырый торган бертуган апасы катнашкан.
Клип башында кешеләрнең бер-берсенә начар мөнәсәбәте күрсәтелә. Әбине таптата язган ир-ат машинасыннан чыгып кычкыра. Ике машина хуҗасы бәйләнешә. Әни кеше баласын ачулана, егет сөйгәнен…
Җырчы якын кешең менә шундый чир белән авырганда, калган көндәлек канәгатьсезлекнең юкка булуын, һәр мизгелнең кадерен белергә кирәклеген күрсәтергә тели.
Ә клип ахырында барысы да киресенчә була. Клип геройлары бер-берсенә яхшы мөнәсәбәттә булуы сурәтләнә.
«Еладым. Бик көчле эмоцияләр, апа-сеңел бәйләнеше, мәгънәле сүзләр, авыр. Ходай ярдәменнән ташламасын. Апаң бик ягымлы», — дип язган Гөлназ Сәфәрова.
«Елый-елый карадым. Чыннан да, бик тетрәндергеч, мәгънәле клип килеп чыккан. Рәхәтлеккә чыдаша алмыйбыз шул. Бер яшибез, матур яшик», — дип комментарий калдырган Башкортстан җырчылары Ләйлә һәм Рөстәм Галиевлар.
Җырчының башка хезмәттәшләре дә клипны тетрәнеп, елап караган.
Бер инстачы «бөртөрлелек» дип бәяләгән һәм клипка «өчле» куйган. Шул уңайдан инстачылар бәхәсләшеп тә алган.