Россиядә социаль пенсияләр киләсе елның 1 апреленнән яңадан каралачак һәм арттырылачак – бу үзгәреш инвалидлык буенча пенсия алучыларга һәм туендыручысын югалткан өчен пенсия алучыларга кагылачак. Бу турыда РИА Новости яза.
РФ пенсия турында законнарыннан билгеле булганча, 1 февральдән иминият пенсияләре индексацияләнәчәк.
«Социаль пенсияләр – ел саен 1 апрельдән, узган елда Россия Федерациясендә пенсионер өчен яшәү минимумы арткан темпларны исәпкә алып индексацияләнә. Социаль пенсияләр индексациясе коэффициенты Россия Федерациясе хөкүмәте тарафыннан билгеләнә», – диелә Россия Федерациясенең пенсия тәэминаты турындагы федераль законда.
Бу төр социаль ярдәм инвалидлыгы булган кешеләргә, шулай ук туендыручысын югалту буенча пенсия алучыларга һәм иминият пенсиясе алу өчен җитәрлек стаж эшләмәгән гражданнарга кагылачак.
Моннан тыш, киләсе ел башында, 1 февральдән, иминият пенсияләре эшләүче һәм эшләмәүче гражданнар өчен дә индексацияләнәчәк, диелә хәбәрдә.
