Республикада яшәүчеләрне мошенникларның яңа схемасы турында кисәтәләр һәм билгесез номерлардан шалтыратулар килгәндә уяу булуларын сорыйлар. Алдакчылар үзләрен Социаль фонд хезмәткәрләре итеп таныштыралар һәм, пенсияләрне яки башка социаль түләүләрне төгәлләштерү яки яңадан исәпләү сылтавы белән, шәхси мәгълүматларын сорыйлар, мондый шалтыратулар барышында җинаятьчеләр ялган юл белән гражданнарның шәхси мәгълүматын алырга тырышалар. Бу турыда Казан мэриясе хәбәр итә.
«Без республика халкын яңа ярдәм чаралары һәм түләүләр турында мәгълүматны Социаль фондның рәсми сайты, РСФ бүлегенең клиент хезмәтләре һәм социаль челтәрләрдәге хисап язмасылары кебек тикшерелгән чыганаклардан гына алырга чакырабыз», – дип ассызыклады РСФның Татарстан Республикасы буенча бүлеге идарәчесе Эдуард Вафин.
Еш кына мошенниклар гражданнарга, янәсе, искергән банк карталары яки пенсия алу өчен хисап язмалары турында хәбәр итә һәм акчаларны үзләре күрсәткән хисапка күчерүне таләп итә.
Шуны истә тотарга кирәк: пенсия түләүләрен китерү ысулын сайлау бары тик пенсионерның үзе тарафыннан Россия Социаль фондының төбәк бүлегенә бирелгән шәхси гаризасы нигезендә башкарыла.
РСФ бүлеге кисәтә: Дәүләт хезмәтләре порталына керү өчен парольне, паспорт мәгълүматларын, банк картасы номерын һәм картаның ПИН-кодын телефон аша тапшырырга ярамый.
Шуны да истә тотарга кирәк, билгесез номердан килгән чакыруларга җавап бирергә һәм аларны раслаучы СМС-кодларны әйтергә ярамый.
Кабул итү бүлекләренә рәсми сайтта гына язылырга мөмкин.
Социаль ярдәм чаралары, фонд бүлегенең түләүләре һәм хезмәт күрсәтүләре турында тулы һәм дөрес мәгълүматны РСФ сайтында һәм рәсми «ВКонтакте» социаль челтәрләрендә, «Одноклассники» төркемендә һәм «Телеграм»да табарга мөмкин.
Өстәмә мәгълүмат яки консультация алу өчен, гражданнар фондның Бердәм контакт-үзәге операторларына 8 800 100 0001 телефоны буенча мөрәҗәгать итә алалар (төбәк линиясенең эш режимы дүшәмбедән пәнҗешәмбегә кадәр – 08:30дан 17:30га кадәр, җомга көнне – 08:30дан 16:15кә кадәр, тәнәфессез, шалтырату бушлай).
