Белгечләр пенсионерның стажын яки хезмәт хакын исәпләү өчен отышлырак шартлар күрсә, кайбер очракларда пенсияләрне яңадан исәпләү автоматик рәвештә үткәрелә. Бу хакта «РИА Новости» агентлыгына Россия Социаль фонды хәбәр иткән.
СФР матбугат хезмәтендә аңлатканча, әгәр түләүләрне исәпләүне яхшырту мөмкинлеге табылса (мәсәлән, стажны яки хезмәт хакын башкача исәпләү варианты аша), фонд хезмәткәрләре кирәкле документларны үзләре җыя башлый һәм яңадан исәпләү үткәрә. Илдә пенсия билгеләгәндә массакүләм хаталарны булдырмас өчен күп дәрәҗәле контроль системасы эшли. Һәр мөрәҗәгать буенча тикшерү барлык баскычларда — клиент хезмәтләреннән алып контроль-ревизия бүлекләренә кадәр үткәрелә.
Аеруча игътибар 2002 елга кадәрге чорларга бирелә, чөнки ул вакытта мәгълүматлар тулысынча сакланмаган булырга мөмкин. Моның өчен түләү эшләрен тикшерү программасы гамәлгә ашырыла. 2019 елдан 2025 елга кадәр белгечләр 40 миллионнан артык эшне тикшергән, ә 1,2 миллионнан артык гражданга стажларын раслауда ярдәм күрсәтелгән. 2026 елда тагын 1,6 миллион пенсия түләүләрен өстәмә тикшерү планлаштырыла, диелә хәбәрдә.