Табиб-офтальмолог Татьяна Шилова сүзләренчә, смартфонда обойлар яки меню төсе күз сәламәтлегенә әллә ни зур йогынты ясамый. Иң мөһиме – экранның яктылыгы һәм тирә-яктагы яктырту шартлары. Бу турыда «Радио 1» яза.
Аның әйтүенчә, якты урында ачык фонда кара хәрефләрне уку уңайлырак. Ә караңгырак шартларда күпләр караңгы теманы сайлый. Әмма әлегә караңгы теманың һәркем өчен файдалы булуын раслаучы төгәл фәнни дәлилләр юк.
Белгеч аңлатканча, гаджетлар кулланганда күзләр ару экран төсеннән түгел, ә башка сәбәпләрдән килеп чыга. Кеше экранга караганда күзен сирәгрәк йома, озак вакыт якын арадагы предметларга гына карый, шуның нәтиҗәсендә күзләр корый һәм арый.
Моннан тыш, күпләр кич белән экранның яктылыгын киметми. Табиб исә караңгы вакытта экран яктылыгын бераз сүрәнәйтергә киңәш итә.
Кичке сәгатьләрдә смартфон кулланганда җылы төсләр кулланучы төнге режимны кабызу да файдалы. Бу организмның биологик ритмнарына йогынтыны киметә һәм йокының сыйфатын яхшыртырга ярдәм итә, диелә хәбәрдә.