Словакия премьер-министры Роберт Фицога һөҗүмнән соң, ил гражданнар сугышы чигендә калган. Бу хакта эчке эшләр министры Матуш Шутай-Эшток әйтте, дип яза LIFE сайты.
«Күпләр чыгарган нәфрәттән бүген давыл купты. Бүген социаль челтәрләрдә мондый нәфрәт тулы комментарийлар бар. Шуны гына сорыйм: моны кичекмәстән туктатыгыз», – дип Шутай-Эшток сүзләрен яза «Novinky.cz» басмасы.
Министр әйткәнчә, премьерга һөҗүм итү сәяси сәбәпләр белән эшләнгән: атучы кеше премьерга нәкъ менә президент сайлауларыннан соң һөҗүм иткән.
15 майда Словакиядә премьер-министр Роберт Фицога һөҗүм иттеләр. Аның корсагы һәм кулы яраланды. Атучы кеше 71 яшьлек язучы Юрай Цинтула булып чыкты, аны шундук кулга алдылар. Цинтула Министрлар Кабинеты сәясәтеннән канәгать булмаган. Хәзер аны гомерлеккә ирегеннән мәхрүм итәргә мөмкиннәр. Ә Фицога ясалган операция уңышлы узган, шуннан соң аны 1 тәүлеккә ясалма комага керткәннәр. Хәзер премьерның хәле тотрыклы дип бәяләнә.