Шампурларны һәм грильне җайлы гына чистарту ысулы
Лимон кислотасы кушылган эремәдә җебегәч, пычрак бик җиңел төшә.
Шашлык ясагач, шампурларны да, грильне дә чистарту җиңел түгел. Моның ике ысулы киңәшләр сайтында чыкты.
Беренче — агрессив химия чараларын яратмаучылар өчен. Шампурларны яки грильне зур савытка салырга. Бер пакет лимон кислотасы алырга. Шампурлар салынган савытка су өстәп, кайнатып чыгарырга һәм лимон кислотасы салырга. Бер-ике сәгать кырыйга алып куеп торырга. Аннар губка белән җиңел генә юып төшерергә.
Икенче ысул өчен химия чаралары кирәк. Бер савыт яки тишексез пакет алырга. Шунда савыт-саба юа торган сыеклыкны бераз салырга, пакет яки савыт стеналарына таратырга. Шунда ук 4-5 аш кашыгы аш содасы салырга, болгатып күбекләндерергә. Пычрак әйберләрне шуңа салып, күбеккә күмәргә. Берничә сәгать торгач, пычрагын юып төшерергә.
