Шәхси ярдәмче хуҗалыкларга сөт сату өчен белешмә алу мәҗбүриме?
Сорауга Казан шәһәре ветеринария берләшмәсе мал табибы Булат Нуриәхмәтов җавап бирде.
- Шәхси ярдәмче хуҗалыклар күзәтчелек объектлары реестрына кертелгән. Моның максаты: кемнең ни белән шөгыльләнүен ачыклау. Шәхси хуҗалыклар продукцияне үзе өчен генә куллана, шәхси хуҗалыкларга сата яки шәхси эшмәкәр, юридик затларга сатамы? Әгәр сөт физик затларга гына сатылса, электрон белешмә кирәкми. Ә менә базарда сату өчен аерым төр продукцияләргә ветеринария белешмәсе тутырыла, - диде Булат Нуриәхмәтов.
ТР Министлар Кабинеты карамагындагы Баш ветеринария идарәсе җитәкчесе урынбасары Габделхак Мотыйгуллин сүзләренчә, шәхси ярдәмче хуҗалыкларда сөт сату буенча проблемалар чыккан юк.
“Бу эшне республиканың ветеринария хезмәте кайгырта”, - диде ул.
- 1 июльдән әзер сөт, ит, балык продукциясе электрон ветеринар сертификат белән генә озатылырга тиеш.