Җырчы Илнат Фәрхуллинның, Мәскәүгә барып, калкансыман бизенә операция ясатуы хакында язган идек. Илнат операциядән соң язылучылары белән элемтәгә чыкты. Барысы да яхшы узган, җырчыны инде хастаханәдән чыгарганнар.
«Барысы да әйбәт узды, дуслар. Бик борчылган идем. Узган ел минем калкансыман биземдә шеш тапканнар иде. Шешне алдылар, калкансыман бизне, барлык кирәкле әйберләрне калдырдылар. Дарулар эчәсе юк, табиблар профессионаллар. Тавыш югалмасын өчен тавыш ярыларын саклау да бик мөһим иде. Шулай оператив, шәп ясауларына мин бик шат. Мин өйгә кузгалам, яңа җырлар, яңа программа өстендә эшли башлыйбыз», – дип сөйләде ул.
Илнатка дуслары тизрәк тернәкләнүен телиләр. «Җиңеп чыккач әйбәт булган», «Исәнлек, брат», «Үзеңне саклап йөр, муеныңны капла, салкын тимәсен», – дип язалар. Кайберәүләр: «Бу операция түләүле идеме?» – дип тә кызыксынганнар. Аларга Илнат: «Бушка бакча артында гына», - дип, шаяртып җавап кайтарган.