Җырчы Артур Салихов социаль челтәрләрдә мәҗлесләрне нибары бер мең сумга алып баруы турында әйтеп, бөтен халыкны шаккаттырган иде. «Интертат» бу турыда язгач: «Алайса әйдәгез безнең Күн авылына юбилей үткәрергә кайтсын. Көтәбез», «Искитмәле алып бара бу егет», - дип комментарийлар яздылар. «Ун меңдер ул», «Бетереп ташламагыз инде, бер ноль өстәгез», «Беренче взностыр ул», - дип ышанмаучылар да табылды.
Калган җырчылар бер мәҗлескә йөз меңнән дә ким сорамаган заманда, моның дөрес сүзме икәнлеген ачыклар өчен «Интертат» җырчы белән элемтәгә керде.
Баксаң, Артур халыкның игътибарын җәлеп итү өчен куйган икән бу постны.
«Тирәнгә китте бу. Шаярттым. Мин бит постның башында «сатыла торган пост» дип яздым. Кешенең очсызга күзе төшә, үземә игътибар юнәтә алдым. Маркетинг үз эшен эшләде, мәҗлесләр алып барырга тәкъдим итеп бик күп кеше язды. Мин чынлап та мәҗлесләрне яхшы алып барам, әмма минем бәяләр 35 меңнән башлана. Килүемне сорап язган кешеләргә шаяртуым турында әйттем, мәҗлеснең ун минуты бер мең сум тора, 5-6 сәгате шул 35 меңгә төшә дип аңлатырга туры килде», - диде ул.
Ай-яй, Артур, халыкны шулай алдаларга ярыймы инде?