Бүген татар эстрадасы примадоннасы Хәния Фәрхинең туган көне. Биктаһирова Хәния Фәрхислам кызы 1960 елның 30 маенда Башкортстанның Тәтешле районы Салаюа авылында туа, 2017 елның 27 июлендә туган авылында ялда булганда вафат булды.
Бүген аның турында истәлекләр чыга. «Татарлар дөньясы» «Телеграм» каналында Хәния Фәрхинең бер концертында кызларына багышлап васыять укыган видеосы чыкты.
– Балаларыбыз тәүфыйклы булсын, безгә оныклар алып кайтсыннар. Балаларым минем, йөрәк парәләрем, – дип әйтә җырчы һәм шигырь укый:
Яңа йортка аяк бастың, кызым,
Һәрбер йортның үз кануны.
Аларча бул, нидер ошамаса,
Кара бары дәшми калуны.
Яңа йортка аяк бастың, кызым.
Ирең өчен яхшы хатын бул,
Өйдәгеләр өчен йомшак бул син,
Гайбәт сүзләр кертмә, каты бул.
Яңа йортка аяк бастың, кызым,
Син баш булма, ирең баш булсын,
Ирең сүзе һәрчак өстен булсын,
Өстәлләрдә һәрчак кайнар аш булсын.
Яңа йортка аяк бастың, кызым,
Син кояш бул, йөзең шат булсын,
Күзкәйләрең һәрчак шатлык булсын,
Сүзкәйләрең һәрчак татлы булсын,
Өскәйләрең һәрчак пакь булсын.
Яңа йортка аяк бастың, кызым,
Кайнанаңа «әнкәй» дип дәш.
Синең өчен ул шундый ул үстергән,
Киңәшләрен тыңла, син бит яшь.
Яңа йортка аяк бастың, кызым…
Үпкәләүне белмә, көлеп тор.
Ирең эшкә китсә, озатып кал,
Тәмле табын белән көтеп тор.
Яңа йортка аяк бастың, кызым...
Сау бул, кызым, безне онытма!
Көтәм синең хакта яхшы сүзләр
Һәм матурдан-матур оныклар.
Васыятен укыгач, Хәния Фәрхи кызына багышлап җыр җырлый.