Татарстан трассасында коточкыч юл-транспорт һәлакәтендә имгәнгән 8 яшьлек кыз бала хастаханәдә вафат булган. Бу хакта «Татар-информ» агентлыгына Татарстан Дәүләт автоинспекциясе хәбәр иткән.
Авария 4 июньдә Сарман районында булган. «Лада Гранта» белән идарә итүче 18 яшьлек йөртүче каршы як полосага чыгып, Toyota Corolla автомобиле белән бәрелешкән.
Юл һәлакәте урынында ук «Лада Гранта»ның 18 яшьлек йөртүчесе һәм аның 32 яшьлек пассажиры һәлак булган.
Моннан тыш, «Лада»да барган тагын бер пассажир, шулай ук чит ил машинасындагы өч кеше җәрәхәтләр алган. Аларның икесе балалар булган.
8 яшьлек кыз бала табибларның барлык тырышлыгына карамастан, хастаханәдә үлгән.
Әлеге юл-транспорт һәлакәте буенча тикшерү эшләре дәвам итә.