Сарман районында эре-эре бозлар яуган: «Бакчадагы помидорлар юкка чыгып бетте!»
Сарман районы Карашай-Саклау авылында бүген төштән соң боз яуган. Карашай-Саклау авылы мәдәният йорты мөдире Алмаз Хөсниев сүзләренчә, эре бозлар бакчадагы үсемлекләргә зыян китергән. Яңгыр бу авылда апрель азагыннан бирле яумаган булган.
— Авылның бер башында вак, уртасында эре бозлар яуды, — ди Алмаз Хөсниев. — Төштән соң сәгать 13:30да яварга тотынды. Бер сәгать яңгыр, аннан соң ярты сәгать боз яуды. Эре бозларның зурлыгы тавык йомыркасы кадәр. Боздан соң янә яңгыр ява башлады. Явым-төшем кичке дүрт-бишләрдә генә туктады. Кичке алтыларда кояш чыкты, боз белән капланган юеш җирләр җилли башлады. Бөтен җирдә су җыелды.
Өлгергән кешеләр машиналарын каплады, ә менә бакчадагы уңышларны каплап калып булмый шул — помидор, кыяр, җиләкләргә бик зур зыян килде.
Галия апа көзен яфрак җыйган кебек, йомырка кадәр боз җыйганын видеога төшергән, классташым Илдар Госманов та машинасын ике кат палас белән ябарга өлгергәне турында сөйли: «Тавык йомыркасы кадәр яуды. Җәй башында кыш килде. Бакчадагы помидорлар, башка яшелчәләр юкка чыгып бетте», — ди ул видеода.
Соңгы тапкыр яңгыр апрель азагында яуды, ул чакта кар әле эреп бетмәгән — яңгыр карны эретеп бетерде. Ике айдан артык яңгыр күрмәдек. Күрше авылларда яңгыр гына яуган, боз төшмәгән. Сарманның үзендә дә явым-төшем булмаган. Нишлисең инде, табигатьтә начар һава торышы булмый, — дип сөйләде Алмаз Хөсниев.