Юмор остасы, Шәрәпҗан образы белән халык күңеленә кергән Рамил Шәрәпов көн кадагындагы темаларны «эләктереп алып» видео да төшереп куя. Бүгенге көндә шундыйларның берсе – мәктәптә электрон дневникның яңа платформага күчүе. Берьюлы барлык укучылар һәм әти-әниләр керергә теләп, ул «катып кала», озак йөкләнә. Бу көннәрдә мәктәптә укытучылар – журналларына, эштән кайткан ата-аналар шул көндәлеккә керергә тырышып кичләрен уздыра.
Кичә генә төбәк ата-аналар җыелышы узды. Ата-аналар телефоннан җыелышка кушыла алмый азапланды. «Кердегезме? Кереп була, кушылыгыз, сораулар бирегез», – дип укытучы ашыктыра.
Шәрәпҗан шул хакта үз видеосында сөйли. Ул аш бүлмәсендә телефонын шкафка кыстырып куйган да ата-аналар җыелышына кушылган.
«Элек җыелыш мәктәптә яки клубта була иде. Хәзер кухняда тыңлап утырасың. Дневникны үзгәрткәннәр. Элек нормальный көндәлек иде, үзең тутыра идең, «2»ле куйсалар, үзең төзәтә ала идең. Хәзер аны таба да алмыйсың, пароль бирәләр, ди. Озакламый, акча күчермичә, билгеләреңне карап та булмас ахры. Шундый матур сөйли, мин бернәрсә аңламыйм. Андый-мондый балалар надан калса, мин гаепле түгел. Мин аңламаганны алар ничек аңласын. Хатын, тыңла радиоприемникларыңны, синең диджейларың сөйли», – дип чынбарлыктан көлә Рамил Шәрәпов.
«Уку уку түгел инде хәзер»;
«Барыбыз да монда»;
«Үләм көлеп»;
«Җыелыштан кайттык. Ничек табарга инде бу журналны дип, телефонны кулга алдым»;
«Шәрәпҗан, син җыелышта икәнеңне исбатлап фото җибәрдеңме, бездән анысын да сорадылар хисап тотарга», – дип комментарийлар язган «темада булучылар».