17 майда Казанда Тынычлык бистәсенең Чаңгы-биатлон комплексында «Сәпит» бәйрәме «Куып җит әле!» хәйрия чарасы оештырыла. Узышта 3 яшьтән 14 яшькә кадәрге балалар, шул исәптән 7 яшьтән алып сәламәтлек мөмкинлекләре чикләнгән балалар катнашырга мөмкин. Бу турыда Казан мэриясе хәбәр итә.
Чара адаптив спортны үстерү, шәһәрлеләр арасында велосипедта йөрүгә кызыксыну уяту, йөрү мәдәниятен таныту һәм халыкка таратуга юнәлдерелгән, дип хәбәр иттеләр Физик культура һәм спорт комитетында.
Программада ярышлар берничә категориягә бүленә: 5 яшьтән 14 яшькә кадәрге балалар өчен шәхси узышлар, иң яшь катнашучылар өчен (3 яшьтән 5 яшькә кадәр) махсус узышлар һәм 7 яшьтән сәламәтлек мөмкинлекләре чикләнгән кешеләр өчен махсус узышлар керә.
Катнашу өчен велосипед һәм шлем, медицина белешмәсе-рөхсәте, спорт иминиятләштерү кәгазе һәм катнашуга тулы ризалык кирәк.
Җиңүчеләрне медальләр һәм дипломнар көтә, ә барлык катнашучыларга истәлекле бүләкләр тапшырачаклар.
Спорт ярышларыннан тыш, мәйданчыкта күңел ачу чаралары һәм яшь талантлар чыгышлары планлаштырылган.
- Теркәлүне 15 май 21:00 сәгатькә кадәр узарга мөмкин.
Старт номерлары 17 майда 9:00 сәгатьтән ярышлар уздырыла торган урында биреләчәк, диелә хәбәрдә.