КФУның Каюм Насыйри исемендәге институтының Санкт-Петербург фәнни-мәгариф үзәге татар теле курсларын яңарту турында игълан итә. Яңа семестр 4 октябрьдә башлана. Бу турыда Татарстан Республикасының Санкт-Петербург шәһәре һәм Ленинград өлкәсендәге даими вәкиллеге хәбәр итте.
Дәресләр якшәмбе көнне 15:00 сәгатьтә үткәреләчәк, төп укытучы — тәҗрибәле педагог һәм методист, Санкт-Петербургның «Ак калфак — Нева» татар хатын-кызлары иҗтимагый оешмасы җитәкчесе Фирая Рәшитова. Аңа лингвист Максим Кузнецов ярдәм итәчәк.
Курсларда гадәттәгечә төрле яшьтәге кешеләр: кайчандыр балачакта татарча сөйләшүчеләр дә, беркайчан да татар телендә бөтенләй сөйләшмәгәннәр дә катнаша ала. Курслар берничә ел эшләп килү дәверендә берничә дистә кеше укуны уңышлы узган.
Телне өйрәнүдән тыш, курс тыңлаучылары даими рәвештә Каюм Насыйри институтында үткәрелә торган мәдәни чараларда: китаплар презентацияләрендә, ачык лекцияләрдә, кызыклы кешеләр белән очрашуларда, татар телендә иҗтимагый диктантларда һ. б. катнаша. Курслар түләүсез (аларга Татарстан Республикасы һәм Санкт-Петербург татар милли-мәдәни автономиясе ярдәм итә).