Сания Әхмәтҗанова «День Победы» җырының сүзләрен тәрҗемә иткән
Шагыйрә җырның сүзләре ашыгыч тәрҗемә ителүен, кырыс хөкем итмәвегезне сорый.
Сания Гәрәбә тәхәллүсе белән иҗат итүче шагыйрә Владимир Харитонов сүзләренә һәм Давид Тухманов көенә язылган «День Победы» җырын тәрҗемә иткән.
«Кадерле дуслар!
Кырыс хөкем итмәвегезне сорыйм. Бөтенроссия флешмобында башкарылганы «Ашыгыч!» үтенече белән бер сәгать эчендә тәрҗемә ителгән иде.
Тексттан читкә чыгарга ярамый, диделәр. Үлчәмгә дә сыешырга кирәк. Берничә вариантта эшләп карадым.
Бүгенгә әзер дигәнен сезнең хөкемгә тапшырам. Монысын да соңгысы дип әйтә алмыйм», — дип язган ул.
Инстачылар тәрҗемәне ошаткан. «Бик шәп булган», «Афәрин!», «Бик шәп килеп чыккан, җырлап та алдым әле», «Бик отышлы тәрҗемә», - дип комментарийлар калдырганнар.
«День Победы» җырының сүзләрен Сания Әхмәтҗанова тәрҗемәсендә сезнең игътибарга дә тәкъдим итәбез.
Җиңү көне! Бик ерак иде даны,
Гомер биреп яулап алдык без аны.
Чакрымнарны күмдек ут-көл астына,
Без бу көнне якынайту хакына.
Кушымта:
Бөек Җиңү көне!
Җанда — чаткысы.
Бөек бәйрәм!
Чал чәчләрдә — яктысы
Бөек шатлык!
Күзләрдә — яшь тамчысы…
Җиңү көне! Җиңү көне! Җиңү көне!
Көне-төне мартен миче тынмады,
Ватан-ана керфеген дә йоммады.
Көне-төне тордык көрәш сафында,
Без бу көнне якынайту хакына.
Кушымта.
Саумы, әнкәй, кайталмады күбебез,
Ялантәпи чык ярмабыз инде без.
Җәяү җиттек җирнең җиде чатына,
Без бу көнне якынайту хакына.
Кушымта.
