Социаль челтәрдә «Видео. Татарстан» төркемендә яңа туган сабый тоткан стюардесса фотосы чыкты. «Урал авиалинияләре» компаниясе самолеты пассажирлары көмәнле хатынга бортта бала таптырган.
Самолет югары биеклеккә күтәрелгәч тә, Мәскәүдән Таҗикстанга очучы көмәнле хатынның эче авырта башлаган. Бортпроводник, ярдәм сорап, пассажирларга мөрәҗәгать иткән.
Бортта неонатолог, ике акушер, хәтта табиб-рентгенолог та булуны могҗиза дияргә була. Табиблар һава судносы командирын ашыгыч рәвештә аэропортка төшү кирәк түгеллегенә ышандырган.
Хатынны идәнгә яткырганнар, уңайлы шартлар тудырганнар һәм стюардессалар аптечкадан кирәкле әйберләрне табибларга биреп торган.
Барысы да яхшы узган. Бер сәгать чамасы узгач, белгечләр ярдәме белән сау-сәламәт кыз бала туган. Аэропортта яшь әнине һәм яңа туган баланы «ашыгыч ярдәм» бригадасы көтеп торган. Баланың авырлыгы 2600 грамм, буе 46 см булган. Хәзерге вакытта ана белән бала хастаханәдән чыккан, алар үзләрен әйбәт хис итә.
«Чыннан да могҗиза диярсең. Оча торган бала тудыру йорты булган бу», «Искитмәле, шундый биеклектә дөньяга аваз салу», «Табибларга рәхмәт, ана белән балага – сәламәтлек», – дигән комментарийлар калдырганнар.
«Шундый срокта бортка ник кертәләр», – дип аптырап язучыга: «Бала иртәрәк тә туарга мөмкин бит», «7 айлык көмән булган очракта табиб белешмәсе булырга тиеш инде», – дип җавап язганнар.
«Туу турындагы таныклыкта кайсы шәһәрне язалар икән», – дип тә кызыксынган берәү.
«Хәзер көмәнле килеш очуны тыярлар инде», – дип кайгыручылар да бар.