Самарада баганага бәрелгән машина берничә өлешкә өзелгән, ике кеше үлгән - видео
Депутат фикеренчә, юлны сыйфатлы итеп төзәтмәү нәтиҗәсендә, фаҗига килеп чыккан.
7 ноябрьдә Самараның Киров районында коточкыч юл һәлакәте була. 2000 елда туган егет идарә итә торган Land Rover машинасы юл кырыена төшеп китә һәм баганага бәрелә. «Вести» каналы шул кадрларны күрсәтте.
Видеода күренгәнчә, автомобиль уртага өзелгән диярлек. Машина салонындагы ике кеше ашыгыч ярдәм килгәнче үк вафат була.
Дәүләт Думасы депутаты Александр Хинштейн әлеге фаҗига турында үз версиясен аңлаткан. Ул биредәге юл хезмәте вәкилләрен гаепли.
«Фаҗига Демократия урамында булган. Бу урынны өлкә буенча Транспорт министрлыгы 2018 елгы чемпионат алдыннан төзекләндергән. Ремонт сыйфатсыз булу сәбәпле, юлда тирән буразналар барлыкка килгән. Моны видеодан күреп була. Менә шул тирән буразналар фаҗигагә китергән инде», — ди депутат.
Хинштейн сүзләренчә, ЮХИДИ бу участокны төзәтүне таләп итеп төбәк хакимиятенә мөрәҗәгать юллаган булган, тик тиешле чаралар кабул ителмәгән, диелә хәбәрдә.