Бу хатын «этләрне яклаган инвалид ир-ат аларның хуҗасы, хайваннарның ветеринария документлары бар», дип раслый. «Бу этләр беркайчан да беркемне дә тешләмәде. Алар кешеләр белән яхшы аралаша, социализацияләшкән. Яраланган эт бик мөлаем, аның кушаматы Лорд. Аның бер күзе күрми. Нинди һөҗүм турында сүз барсын?» — дип сөйләгән Екатерина КП_Самара басмасына.
Вакыйганың башка версияләре дә бар. Джиптагы ир-атлар хайваннарны агрессив дип әйтә. Аларның сүзләренчә, башта этләр чирүе кыз кешегә ташланган. Бу ир-атларның берсе кызны яклаган, аның үзен эт тешләгән. Шуннан соң бу ир-ат иптәшләрен ярдәмгә чакырган.
Социаль челтәр кулланучыларның бер өлеше бу версияне раслый. «Мин бу йортта яшим. Бу беренче очрак кына түгел. Бу этләр чирүе балаларны да тешләде, олыларны да. Кибеттән чыккан кешеләрнең пакетларын да талап алдылар», — дип яза биредә яшәүче хатын.
Якында гына яшәүче Алексей исемле ир-ат этләрдән зарлана. «Аена өч-дүрт тапкыр шушы чирү яныннан узам. Күптән күзәтәм аларны. Этләр — йортта яши дию — ялган. Алар гел урамда. Аларның кыяфәте дә сукбай этнеке кебек. Биш яшьлек бала белән анага ырылдауларын үзем күреп тордым, тешләмәкчеләр дә иде. Куарга туры килде», — ди ул.
Хокук саклау органнары бу вакыйга турында аңлатма биргән. Ике ир-ат та бер-берсенә карата шикаять язган. Медицина оешмаларыннан полициягә хәбәр килмәде, диелгән әлеге хәбәрдә.
