Салкынга чыдый алмасаң, нишләргә?
Психолог дөрес туклану кышкы салкыннарны кичерергә ярдәм итә дип саный.
Елның салкын фасылында үзеңне яхшы хис итү өчен, физик халәтне күзәтеп торырга, үзеңә-үзең мәрхәмәтле, организмның кайгыртучан хуҗасы булырга кирәк. Бу турыда психолог Дмитрий Синарев «Прайм» агентлыгына сөйли.
«Менюны алдан уйлап куегыз. Азык-төлек төрлерәк булган саен, физик халәтегез дә яхшырыр, димәк, кәеф тә яхшы була. Организмның салкын белән көрәше — энергия күп сарыф ителә торган халәт, кышын диета тотмау хәерле. Калорияле, витаминнарга бай ризык безгә хәзер бигрәк тә кирәк, бу табигый һәм нормаль процесс», — ди Синарев.
Аның сүзләренчә, хәрәкәтләнү активлыгы да мөһим. Иртәнге йөгерү, җәяүләп йөрү, велосипедта йөрү, фитнес кирәк. Синарев организмга йөкләмә бирергә, аңа «йокыга китәргә ирек бирмәскә» киңәш итә.