«Салават Юлаев» экс-тренеры КХЛдан китүче легионерлар турында: «Безнең хоккей үлми»
Континенталь хоккей лигасы командаларында уйнаучы чит ил спортчылары күпләп контрактларын өзә башлаган.
Уфаның «Салават Юлаев» хоккей клубының һәм Россия җыелмасының элеккеге баш тренеры Вячеслав Быков континенталь хоккей лигасыннан (КХЛ) чит ил легионерлары контрактларын өзеп, күпләп китү турында фикерен әйтте. Бу турыда «Татар-информ» язды.
«Сәясәт күптән спортка кереп кенә калмады, үз шартларын да куя инде. КХЛ легионерлары белән булган хәлгә гаҗәпләнмим. Чит ил спортчыларының да берәрсенә таш атмас идем — һәркем үз юлын үзе сайлый. Минемчә, бу очракта без үзебезнең спортка, үзебезнең егетләргә ярдәм итәргә, яшьләргә урын бушатырга, аларны алдынгы ярышларда катнаштырырга тиеш. Хоккей моңа карап кына үлми.
Мин Вячеслав Фетисовның сүзләре белән килешәм. Ул Россиядә безнең хоккейны үстерергә кирәк, ди. Югары класслы уенчылар китүе кызганыч инде, тик бу аларның карары. Үз эшебезне эшләргә кирәк», — ди ул «Чемпионат» сайтына.