Салават районында ябалак бер баланың күзен чокып чыгарган
Су коенып кайтып килгәндә малайлар чирәм арасыннан ябалак баласы табып алган булган.
Башкортстанның Салават районында шушы көннәрдә балаларга ябалак ташлана. Бу турыда «Йүрүзән» сайты язды.
Юныс авылында яшәүче малайлар елгага су коенырга бара. Өйгә кайтып барышлый алар чирәмдә ябалак баласы күрә. Малайларның берсе ябалак баласын кулына ала. Шул чакта ана ябалак килеп чыга һәм малайга ташлана.
Ябалак малайның күзенә һөҗүм итә. Малайны хастаханәгә китерәләр, тик күзне саклап калып булмый. Имгәнгән балага Уфада берничә операция ясаганнар.
Әлеге вакыйга турында «Башинформ» агентлыгы да хәбәр итте.
Белгечләр искәрткәнчә, балаларына куркыныч янаганда хайваннарның күбесе һөҗүмгә күчә. Ерткыч кош ябалак та нәни ябалак балаларын соңгы сулышына кадәр яклаячак, диелә бу хәбәрдә.
