Татар эстрадасында популяр җырчы булган, аннары дингә ныклап кереп китү сәбәпле, сәхнәне калдырган, хәзер хәләл мәҗлесләр алып баручы Салават Миңнеханов социаль челтәрдәге сәхифәсендә лайфхак белән бүлеште.
«Күп функцияле үзәк (МФЦ) операторларына 10 секундта ничек шалтыратырга? Элек аларга шалтыраткач, җавап бирүләрен шактый озак көтә идем, ә бүген мин хәйләләдем.
Әгәр күп функцияле үзәккә шалтыратасыз икән, сезгә: «Татар телендә сөйләшәсегез килсә – 1 санына, ә рус телендә сөйләшәсегез килсә 2гә басыгыз», – дип әйтәләр. 1 санына басыгыз! Сезгә 3 секундта ук, матур тавыш белән: «Исәнмесез, сезнең нинди сорауларыгыз бар?» – дип әйтәчәкләр.
Менә, дуслар, татар телен белү процессны тизләтә, ә белмәү 20-30 минут көтәргә мәҗбүр итә. Шуңа күрә татар телен өйрәнегез!» – дип сөйләде артист.