Җырчы, эшмәкәр Салават Миңнеханов төзелеп ята торган мунчасы белән виртуаль дусларын таныштырган. Дөресрәге, булачак мунчасының интерьерын күрсәткән.
«Күпләр мунчабызның төзелеше белән кызыксына. Тәк менә! Әлегә без интерьер өстендә эшлибез, газ өчен проектка заказ бирдек, җылылык кертергә кирәк-яраклар, мич, казан сатып алдык. Дөресен генә әйткәндә, беркая да ашыкмыйм, әкрен генә, җай белән, мөмкинлекләрдән чыгып селкенәбез. Ни дисәң дә, хыялдагы мунча ясыйсы килә.
Сүз уңаеннан, йә ничек сезгә интерьер? Күп кенә дизайнерларга мөрәҗәгать иттек. Ләкин бөтенесе арасыннан безнең теләкләрне истә тотып эшләргә риза булучы берәү генә табылды. Архитектор-дизайнер Әнвәр», – дип язган Салават социаль челтәрдә.
Мунчаның интерьерын күреп, халык «аһ» иткән. «Бу бит могҗиза! Бу бит әкият! Искиткеч матур! Барысы да сез уйлаганча килеп чыксын. Рәхәтен күрергә язсын», «Бу мунча түгел, Салават. Җәннәт бакчасы. Бәхеттә яшәгез», «Хан мунчасы кебек. «Великолепный век» сериалын хәтерләтә», «Бу мунчада яшәргә дә була», «Шә-ә-әп! Куанычы булсын», «Юынырга куркып утыра торган була бу», – дип хозурланганнар Салаватның дуслары.
«Мин әле сезнең теге бармак куеп кына ачыла торган ишекләрегездән тәэсирләнеп йөри идем», – дип язып куйган берәү, Салаватларның күптән түгел генә куйдырган заманча ишеген искә алып.
