Салават Миңнеханов ни өчен мәрхүмнәрнең кабер ташына фотосурәт куярга ярамавын аңлаткан

Салават Миннеханов социаль челтәрләрдә ни өчен мәрхүмнәрнең кабер ташына фотосурәт куярга ярамавы турында сөйләгән. 

Күпләр үзләренең якыннарының каберләренә фотосурәт белән кабер ташы куя. Мәрхүмне онытмас өчендер инде бу. Әмма бу без - исәннәрнең теләге. Бер генә хәзрәт тә сезгә мәрхүмнәрнең кабер ташына фотография куярга ярый дигән сүз әйтмәячәк.

Кыямәт көнен мәрхүмнәр каберләрендә көтә. Әмма алар өчен күпме генә дога, Гомрә, Хаҗ кылмыйк, мәрхүмнең кабер ташында фотосурәт бар икән, догалар барып җитмәскә мөмкин. Чөнки сурәт булган урынга фәрештәләр килми.

Әлбәттә, кабер ташларына фотосурәт куйган кешеләр минем белән килешмәскә мөмкин, чөнки алар өчен күп акчалар сарыф ителгән.  Әмма якыннарыгызның якты, иркен, җылы кабердә ятуларын, аларның гөнаһлары кичерелүен теләсәгез, кабер ташларыннан фотоларны алып ташлагыз. Якыннарыгыз өчен доганы елы җиткәндә генә түгел, көн саен кылыгыз. Ышаныгыз, алар бездән дога өмет итә», - дигән ул.

Салават Миннеханов белән Гүзәлем Мәккәдә изге хаҗ сәфәрендә булып кайтты. Җырчы Мәккәдәге пәйгамбәребез мәчете янәшәсендәге зиратны күрсәтеп, әлеге постына мисал да китергән. Мәккә зиратында бөтен каберләр дә бертигез, бер-берсеннән тамчы да аерылмый, хәтта чардуганнары да юк. Кабер өстенә кечкенә таш кына бастырып куйганнар.