Салават Фәтхетдинов Фирзәр Мортазинга утырып йөрергә яраксыз машина бүләк иткән

21 гыйнварда Фирзәр Мортазинга 65 яшь тулды. Шул уңайдан, композиторның иҗат кичәсе узды. Салават Фәтхетдинов Фирзәр Мортазинның туган көненә утырып йөрергә ярамый торган машина бүләк иткән.

– Бүләк ул кирәкле булырга, истә калырлык булырга тиеш. Ул аны алырга тиеш… – дип сөйли башлый Салават Фәтхетдинов.

 – Син нәрсә бирсәң дә – кирәк миңа! – ди Фирзәр.

 – Нәрсә алып килим, дип уйладым да. Мәйтәм, яхшы гына коньяк алып килсәм, сразы шунда эчеп бетерә инде бу. Акча бирсәм, тоже эчеп бетерә. Эчеп бетермисең инде, кулланасың. Берәр кием алсаң, случайно гына замогы ватылса, «Әй хайван, җүнле әйбер дә бүләк итә белмәде», – диячәк. Уйладым-уйладым да, әзи, чынлап, шаярту түгел бу – утырып йөрергә ярамый торган машина бүләк итәргә булдым. Сиңа түгел! Наиләгә, хатыныңа. Өч төрле вариант – тегү машинасы, кер юу машинасы, савыт-саба юу машинасы. Кайсын тели – бәясе исәпкә керми. Бүләк шундый булыр, яме!»