Салават Фәтхетдиновның улы узышларда беренче килгәч, комментатор татарча җырлаган
Комментатор «Мин яратам сине, Татарстан» җырының бер куплетын башкарган.
Салават Фәтхетдиновның улы, узышчы Рөстәм Фәтхетдинов Грозныйда узган Россия боҗралы узышлар сериясенең 3 этабында беренче килгән. Бу хакта Салават Фәтхетдинов инстаграмда хәбәр итә. Җырчының улы белән горурлану хисләре ярларыннан чыгып ташый. Видео төшергәндә җырчының бик нык дулкынлануы сизелә.
«Кеше ышанмаслык. Ике узыш һәм икесендә дә җиңү. Казан — Грозный рулит. Хәзер 20 августка кадәр тынычланырга кирәк. Алда концертлар. Барыгызны да Камал театрында көтеп калам», — дип язган Салават Зәкиевич инстаграмга.
Иң кызыгы — Рөстәмнең уңышларына ярышларның комментаторы да Салаватның үзеннән ким сөенмәгән. «Рөстәм өлкәннәр зачетында да җиңү яуласа, мин сезгә туры эфирда җырларга вәгъдә биргән идем. Сүземдә торам», — дип, «Мин яратам сине, Татарстан» җырының бер куплетын башкарган ул.
«Татарстанны яратучылар җыры. Салават Фәтхетдиновның җыры. Гадәттә, ул бу җыр белән үзенең концертларын төгәлли. Ә без аның белән бу искиткеч ярышларны йомгаклап куябыз», — дигән комментатор.