Салават Фәтхетдинов Фирзәр Мортазинның портретын «Үлемсез полк» дип күтәреп йөргән
Җырчы инстаграмдагы яңа видеосы белән инстачыларның котын алган.
Салават Фәтхетдинов интстаграмдагы яңа видеосы белән инстачыларны куркыткан. Ул композитор Фирзәр Мортазинның зур портретын күтәреп, баскычтан менеп килә. «Бүген „Үлемсез полк“ демонстрациясе булды. Шуннан кайтып киләм әле, ардым», — ди. Камал театрында үзенең концертлары баруын да хәбәр итә.
Җырчының исән кешенең портретын «Үлемсез полк» дип күтәреп йөрүен күбесе аңламаган.
«Уф, котымны алдың. Кара ленталы, кеше үлгәч куя торган фото дип торам», «Бу авыр туфрагың җиңел булсын дигән кебек булды инде», «Юрама әле, Салават, юш килмәсен», «Син үз акылыңдамы?», «Зинһар, алып ташлагыз бу видеоны», — дип язганнар.
Кайберәүләр моны юмор итеп кабул иткән. Елмаюлы смайллар калдырганнар. «Артист халкы чыннан да «Үлемсез полк» инде ул. Чын артистны халык беркайчан да онытмый. Чиле-пешлеләре бүген җырлый, иртәгә аны белүче дә булмый», «Салават, син үзең дә «Үлемсез полк», — дигәннәр.