Социаль челтәрләрдә шаян видеолар куеп танылган Шәкүр бабай кешегә ияләшкән һәм тәмле әйберләр ашарга яратучы поши күрсәтте. Кыргый җанвар Шәкүр бабайның туганы Гаяз Галиевне үз иткән. Беренче видеода поши, сикерә-сикерә, йөк машинасы эченә кермәкче була. Икенче видеода Гаяз кыргый дустына кабыгыннан чистартып сосиска ашата.
«Минем туганымның яраткан җанвары. Көн саен урманда көтеп каршы ала ул аны. Ә Гаяз аны тәмле әйберләр белән сыйлый», – дип шәрехли Шәкүр бабай постларны.
Шәкүр бабай видеоларны Рифат Зариповның «Тукта, тукта» дигән җырына куеп керткән. Анда бу кадрларга туры килә торган:
Син кайда ул шунда,
Армыйча артыңнан ашкына.
Үзе курка, үзе тартыла, – дигән сүзләр бар.
Комментарийларда Шәкүр бабай кызык пошиның исеме Победа булуы турында яза.
