Телевизион тапшырулар алып баручы, блогер Венера Аитова өченчегә әни булачак. Матур хәбәрне ул үзенең сәхифәсендә җиткерде.
«Кечкенә генә могҗиза. Бу җәйнең биюе. Көтәбез», – дип язды һәм йөкле икәнлеге күренгән матур видео урнаштырды ул социаль челтәрләрдә.
Венера Аитова тормыш иптәше Динар белән ике малай тәрбияли. Гомәргә – 6, Гаязга – 4 яшь. Гаилә, тәвәккәлләп, өченчесе артыннан да барырга ниятләгән.
«Котлыйм, Венера. Нинди зур шатлык», «Нинди сөенеч. Котлыйбыз. Бии-бии, рәхәтләнеп, җиңел итеп күтәрергә язсын», «СөбханАллаһ, шаккатыра беләсең. Сау-сәламәт булыгыз», «Чиксез шатмын сезнең өчен», – дип, берсеннән-берсе матур комментарийлар калдыралар аларга дуслары.
Венера Аитованы без дә котлыйбыз. Бәби сау-сәламәт булып, бәхете белән килсен бу якты дөньяга!