Шайтан кешелеккә ни өчен кирәк?
Казанның «Туган авылым» мәчете имам-хатыйбы Нурулла хәзрәт Зиннәтуллин шайтаннарның тормышыбыздагы роле турында сөйли
– Аллаһы Тәгалә ни өчен шайтанны бар иткән? Шайтан булмаса, коткы-вәсвәсә булмас иде, кеше өчен сынау булмас иде. Ничек яхшыны яманнан аерырга?
Мин кайчакларда юлсыз җирләрдән дә шәп чабучы машиналар узышын карыйм. Анда «Нива», Уазик, Suzuki Jimny, Prado, Subaru – шундый машиналар. Ахырда нәтиҗә ясала: менә бу машина әйбәт, ватылмады, бөтен җиргә дә үтеп керде, барысыннан исән чыкты, финишка килеп җитте. Әгәр бу ярыш булмаса – ләмдә йөзү, кәлиядә йөрү белән сынау һәм башкасы – кайсы машина әйбәт икәнен без каян беләбез, ничек сыныйбыз? Чөнки автосалонда торганда, алар барысы да матур, балкып тора. Утырып, кабызып, кузгалып киткәнче, алар барысы да яхшы.
Ә кешенең әйбәтме-юкмы икәнен сынамый гына каян беләсең? Шайтан – ул сынау өчен корал. Кеше балчыктан яралган, шайтан – уттан. Балчыкны ут белән сынагач, ул түзсә, ахырда кирпеч барлыкка килә. Ягъни, ныклы, коелмый торган, файдалы әйбәт материал. Әгәр шайтан кеше янына килеп, кеше аның белән сынауны узса, ул чын кеше була һәм оҗмахка лаек була. Шуңа күрә Аллаһы Тәгалә шайтанны яхшыны яманнан аеру өчен калдырган.