8 августта Югары Ослан районының Кызыл Байрак авылында «Сәйдәшстан» музыкаль фестивале узачак. Чара 17:00 сәгатьтә Мәдәният йорты каршындагы ачык мәйданда башлана. Фестивальне Татарстан Республикасы Мәдәният министрлыгы һәм Камал театры оештыра.
Фестиваль программасында — театр оркестры башкаруында татар классик-композиторлары әсәрләре, шулай ук Holofonote проектының оркестр белән берлектә татар темаларына DJ-сеты. Оркестрның сәнгать җитәкчесе һәм баш дирижеры — Данияр Соколов. Солистлар арасында: Татарстанның атказанган артистлары Ришат Әхмәдуллин, Рамил Шәмсуаров, Ирек Кашапов, шулай ук Райхан Габдуллина, Айгөл Гардисламова һәм Адель Равилов була, дип хәбәр итә оештыручылар.
- «Сәйдәшстан» фестивале 2000 елдан бирле үткәрелә. Ул татар профессиональ музыкасына нигез салучы күренекле композитор Салих Сәйдәшев истәлегенә оештырыла. Фестиваль ел саен Кызыл Байракта үтә.