Петербургның СКА командасында уйнаучы 14 яшьлек хоккейчы тренировка вакытында һәлак булган. Аның йөрәгенә шайба килеп бәрелгән. Бу турыда клубның матбугат хезмәтенә сылтама белән «Комсомольская правда» хәбәр итте.
Матбугат хезмәте белешмәсе буенча, яшь спортчы гадәти тренировкага килә. Биредә СКА командасының 2008 елда туган уенчылары җыела. Күнегүләрнең берсе вакытында бәхетсезлек очрагы килеп чыга.
«Сакчы бәргәч, шайба уенчының күкрәгенә – йөрәк турысына тиде. Команда табиблары ярдәм күрсәтте, ашыгыч ярдәм чакырылды. Реанимация чаралары уздыруга карамастан, хоккейчыны коткара алмадылар», – диелә хәбәрдә.
