«Сабый үлде». Биш ай буе авырлы булуын белмәгән хатынны табиблар хәлсезлектән дәвалаган

Иркутск шәһәрендә яшәүче хатын табибларны судка биргән һәм аның авырлы булуын вакытында ачыкламаган өчен, ярты миллион сум акча алачак. Бу турыда «Комсомольская правда» хәбәр итте.

Бу хатын 5 ай дәвамында авырлы булуын белми, табиблар аны кәефе начар булудан дәвалый. Сабый авыру булып туа һәм үлә. 

Хатын авырлы булуын белмичә, кәефе начар булуга зарлана, хастаханәгә бара, гинекологка күренә, анализлар тапшыра, тикшеренү уза, һәм аны дәвалау планын да төзиләр.

Планлы медосмотр вакытында гына аның авырлы булуы ачыклана.

«Консилиум кесарев кисеме ясау өчен экстрен операция турында карар кабул итә. Бала бик авыр хәлдә туа, ул бер ай да яшәми, төрле җитешсезлекләр аркасында вафат була», – дигәннәр Иркутск өлкә судында.

Экспертизалар күрсәткәнчә, хастаханәдә вакытында һәм дөрес ярдәм күрсәтергә була иде, тик бөтен тиешле чаралар да күрелмәгән.

«Беренче инстанция суды нәтиҗәсе буенча, табиблар вакытында һәм дөрес диагноз куймаган, бу исә йөклелек чорын җитәрлек күзәтмәү һәм контроль булмауга китерә, аннары бала тудыру тактикасын билгеләүдә кыенлыклар килеп чыга», – дигәннәр судта.

Ленин районы суды карары буенча, хастаханә бу хатынга мораль зыян өчен 10 мең сум түләргә тиеш була. Ләкин хатын моның белән килешми, өлкә судына мөрәҗәгать итә. Шулай итеп медицина хезмәтләрен сыйфатлы итеп күрсәтмәгән өчен, хастаханә бу хатынга 500 мең сум түләргә тиеш, диелә хәбәрдә.