«Сабан туена бәрәңге алабыз инде» – Актанышның Пучы авылында бәрәңгене агулап утыртканнар

Блогер Иршат Нәбиев (Морган) туган ягы Актаныш районы Пучы авылына бәрәңге утыртырга кайткан. Шулай итеп, 19 апрельдә ул әти-әнисе һәм туганнары белән «икенче икмәк»не утыртып та куйган. Блогер бәрәңгене «тәмләп» утырту мизгелләре белән социаль челтәрдәге битендә уртаклашты.

Бәрәңге бүлбеләрен башта пакетка салып, өстенә агу сипкәннәр, шул арада, агу тигез эләксен өчен, селкеткәләп тә алганнар.

Аннары буразналар тигез булсын өчен җеп тә сузганнар, чокырлар казып чыкканнар. Анда суган кабыгы һәм көл сипкәннәр, соңыннан бәрәңге бүлбесе салганнар. Эш беткәч, бакчаны тырмалап та чыкканнар.

«Нәрсә, әти, булдырдыкмы? Бер чүп тә юк, барысы да идеально булды. Сабантуйларга бәрәңге алырбыз инде», – дип сөйли блогер.