Саба районы Пүкәл авылында фаҗига булган гаилә турында: «Тәртипле, әйбәт гаилә иде»
Әлегә кадәр 18 яшьлек егет белән бернинди дә проблемалар булмаган.
Саба районы Пүкәл авылында 6 июнь көнне бер гаиләдә коточкыч фаҗига була. 18 яшьлек малай үзенең әти-әнисенә пычак кадый һәм өйләренә ут төртә.
«Тәртипле, әйбәт гаилә иде. Әнисе эшләми, өйдә иде, әтисе сак хезмәтендә эшләде. И... Казанда техникумда укый. Аның белән шәхсән таныш түгелмен, төгәл генә берни дә әйтә алмыйм. Гаиләдә ул өченче бала, тагын ике апасы бар аның. Бүген әтисен -Зөфәрне җирләделәр. Әнисе һәм үзе авыр хәлдә хастаханәдә ята. Әлегә тикшерү эшләре бара, бернәрсә дә сөйли алмыйм. Аның белән бәйле проблемалар элек булганы юк иде әле», — дип белдерде Саба районы Эзмә авылы җирлеге башлыгы Альмир Шәйхетдинов.
Җинаять турында 2020 елның 7 июнендә төнлә билгеле була. Пүкәл авылына янгын чыгу куркынычы буенча килгән коткаручылар гаиләнең өч әгъзасының да яраланган булуын күрә. Берничә сәгатьтән соң йорт хуҗасы хастаханәдә үлгән, 53 яшьлек хатын-кызның гомере өчен табиблар көрәшә. Ә аларның уллары үтерүдә шикләнеп кулга алынган.
«Ул аңа тиешле игътибар бирмәгән өчен ата-анасын үтерүгә алдан әзерләнүен әйтте», — дип әйткән ТР буенча Тикшерү комитеты җитәкчесенең өлкән ярдәмчесе Андрей Шептицкий "Реальное время» интернет сайтына.