Татарстанның Саба районында игезәк бала тапкан хатын-кызларга өстәмә түләүләр кертелгән. Игезәкләрнең әниләренә 1 ел дәвамында ай саен 5 мең сум түләнәчәк. Карарны район башкарма комитеты җитәкчесе Марат Ишниязов имзалаган.
«Өстәмә социаль ярдәм чарасы – Татарстан Республикасы Саба муниципаль районында игезәк бала тапкан хатын-кызларга 1 ел дәвамында ай саен 5000 сум күләмендә акчалата түләү билгеләргә», – диелә карарда.
Шулай итеп, игезәкләр тапкан хатын-кызларга җирле бюджеттан 1 елда 60 мең сум түләнәчәк. Бу карар 2025 елның башында игезәкләр табучыларга да кагыла.