«Сөяк һәм тире» - Унөч яшьлек кыз ябыгып, ундүрт килога калган

Бурятиядә яшәүче 13 яшьлек кыз бала ябыга башлый һәм 14 килограмм авырлыкта кала. Анасы моны баланың авыруы белән аңлата, тик үзе табибларга мөрәҗәгать итми. Бу турыда «Комсомольская правда» хәбәр итте.

Заиграевский районында яшәүче 13 яшьлек кыз баланы 2020 елның 21 ноябрендә хастаханәгә китерәләр. Ул ябыгып беткән була. Балада чын мәгънәсендә сөяк һәм тире генә калган. Аны үлчәгәч, табиблар да шок халәтендә була. Кыз 14 килограмм авырлыкта икәне ачыклана.

Табиблар Тикшерү комитетына һәм прокуратурага хәбәр итә. Әлеге вакыйганы Бурятия тикшерүчеләре өйрәнә башлый. Шуннан соң «балигъ булмаган баланы тәрбияләү буенча вазифаларны тиешенчә үтәмәү» маддәсе буенча җинаять эше ачыла.

Ябыгып беткән баланың бер авылда әнисе белән яшәвен ачыклыйлар. Бу хатын өч баласын бер үзе үстерә. Гаилә опека органнарында хисапта тормый.

Хатын кызының коточкыч халәтен үзенчә аңлата. «Аның сүзләренчә, бала туганда травма алган, аның гомуми авыруы бар, шуңа күрә ябыккан. Ул кызын дәвалау өчен хастаханәгә мөрәҗәгать итмәгән. Баланың хәле бөтенләй начарланганга кадәр табибларга күрсәтмәгән», — дип сөйләгәннәр «КП-Иркутск» сайтына Тикшерү комитетында.

Хәзер тикшерү эшләре дәвам итә, экспертизалар билгеләнгән, баланың ябыгу сәбәбе ачыкланачак, диелә бу хәбәрдә.