Сөмбел Заһидуллина Кыш бабайдан үзенчәлекле бүләк сораган
Җырчыга 180 сантиметрлы бәхет кирәк...
Яңа елга кадәр әле шактый вакыт булса да, җырчыларның социаль челтәрләрен бизәлгән чыршы янында ялтыравыклы күлмәктән төшкән фотолар бизи башлады. Сөмбел Заһидуллина да башкалардан калышмаган. Чыршы янында төшкән фотосына өстәп, ул Кыш бабайдан нинди бүләк көтүе турында да язган. Әйтергә кирәк, җырчы шактый үзенчәлекле бүләк сораган.
«Тизрәк Яңа ел җитүен телим. Төн уртасында урамга чыгып, күккә карыйсым килә. Кар бөртекләрен тотып алып, тормыш дәвам иткәнлеген аңларга телим, — дип хыялланган романтик кыз. — Хөрмәтле Кыш бабай! Миңа чыршы төбендә бүләк итеп бәхет калдыр, зинһар. 180 метр буйлы, матур күзле булсын».
«Акыллы, юмарт, буйдак, сәламәт…» — дип дәвам иткән Сөмбелнең теләкләрен бер инстачы.
Ә берничә кеше җырчыга бәхетне Кыш бабайдан түгел, югарыдан сорарга кушкан.
«Хәерле еллар булсын, кызым. Аллаһы Тәгаләдән сора бәхетне. Чыршы да, Кыш бабай да бирми аны», — дигәннәр.
«Ашыктырма, бүгенге көн яхшырак. Ә бәхет бабайсыз да юл таба! Насыйп булса. Иң мөһиме — тапкач югалтма. Тел-маңгай ачкычларың үзеңдә булсын. Эх, улымның буе 184 шул. 34 яшь, көне-төне эшли, бер дә өйләнмәгән, эчми-тартмый. Ул кемнәргә насыйп булыр», — дип язган бер апа.