Сәер үлем: Башкалага чыршы бәйрәменә килгән укучы кыз вафат булган
12 яшьлек кыз бала хостелда җан биргән.
Среднеуральск шәһәреннән Мәскәүгә Кремль чыршысына килгән укучы кыз бала вафат булган. Бала хостелда сәер үлем белән үлгән, дип яза «МК» сайты.
4 гыйнварга каршы төндә башкаладагы хостелларның берсендә 12 яшьлек кыз бала җан биргән. Аның нәселдән килгән авырудан үлүе ихтимал, диелгән әлеге хәбәрдә.
«МК» сайтына үз чыганагы хәбәр иткәнчә, 3 гыйнвар кичендә 12 яшьлек кызның хәле китә. Бала бик каты коса башлый.
Мәрхүмә кыз әти-әнисе белән «Артист» хостелында туктаган. Төн уртасында бирегә ашыгыч ярдәм килгән. Табиблар килгәндә кыз бала комада була, озак та тормыйча җан бирә.
Әнисе сүзләренчә, кызда Ли синдромы була. Бу — генетик нәселдән килә торган авыру. Әлеге синдром нерв системасы үсешенә йогынты ясый, диелгән әлеге хәбәрдә.