Рязаньдагы юл һәлакәтендә исән калучы авариядән соң беренче минутлар турында сөйләде
«Башым бәрелүдән уянып киттем, аңымны югалттым», — ди зыян күрүче.
Рязань өлкәсендәге юл һәлакәтендә исән калган пассажир Жумабай Кусманов бәрелештән соң беренче минутлары турында сөйләде.
«Авария вакытында мин йоклый идем. Башым бәрелүдән уянып киттем, аягым кысылган иде. Йөземә ниндидер кайнар әйбер түгелгән иде. Кан дип уйладым. Башта аңымны югалттым, берни дә хәтерләмәдем. Ике минутлап утырып тордым, аңыма килдем. Электр җиһазлары сүнгән иде, караңгы, паника», — дип сөйләгән ир-ат РЕН ТВтелеканалына.
Зыян күрүче сүзләренчә, ул Мәскәүдәге эшеннән Волгоградка өенә кайта торган булган. Юлда ул автобус йөртүченең тизлекне арттырмавына игътибар иткән — автобус сәгатенә 60-70 километр тизлектә барган.
«Әкрен генә бара иде. Мин әле: „Молодец, акрын бара“, — дип уйлап куйдым», — дип искә ала Жумабай Кусманов.
Аның әйтүенчә, автобусның юл буе дворниклары эшләгән, кар яуган. «Юл начар күренгәндер, мөгаен», — ди ул.
Бүген 05.45 сәгатьтә Мәскәү — Әстерхан юнәлешендә хәрәкәт итә торган автобус пассажирлар белән Рязань өлкәсендәге тимер юл күперенең терәгенә бәрелгән. Биш кеше, шул исәптән машина йөртүче, үлгән, 22 кеше зыян күргән.
Саксызлык аркасында ике һәм аннан күбрәк кешенең үлеменә китергән юл хәрәкәте кагыйдәләрен бозу турында җинаять эше кузгатылган. Россия Тикшерү комитеты рәисе Александр Бастрыкин юл һәлакәте сәбәпләрен тикшерү барышын контрольгә алды.