Җырчы Рузилә Хәйретдинованың хәзерге көндә кибете бар. «Кием-салым булмаса, нәрсә белән шөгыльләнер идегез?» – дип сораган язылучылары. Шул уңайдан Рузилә «элеккеге» шөгыльләрен дә искә алган.
«Мин бервакытта да бернинди эштән дә курыкмадым. Мин балалар бакчасында да, гомуми белем бирү һәм музыка мәктәпләрендә дә, ТР Мәдәният министрлыгында да эшләдем. Картлар йортында «хозчасть» буенча урынбасар булып эшләргә дә туры килде.
Кием-салым булмаса, башка әйбер уйлап табар идем, һичшиксез», – дип яза ул.
Бу җавабы белән Рузилә кайберәүләрне шаккатырган. «Абау, сез үзегез турындагы мифны тараттыгыз. Мин шаккаттым», – дип язганнар.
«Минем хакта төрле гайбәт йөри. Бик әз кеше генә дөресен белә. Мин – исән калу өчен «җир кимергән» кеше», – дип язган Рузилә.
