Җырчы яңа дуэт яздыру турында уйлана башлаган. Иҗатташ дусты Рамил Галимҗанов белән җырлаячак ул. Репетициядән бер өзекне ул телеграм каналындагы виртуаль дусларына тәкъдим иткән.
«Ничек уйлыйсыз, Рамил белән дуэт яздырсак?» – дип киңәш сораган Руслан телеграмдагы дусларыннан.
«Шулкадәр матур булачак!» «Руслан, шәп дуэт көтелә, икеләнмәгез», «Тавышларыгыз охшаган», «Икегезне дә яратабыз. Ике моң чишмәсе», «Җырлагыз, халык яратачак!» – дип хуплаган аларны бер төркем халык.
Икенче бер төркем исә килештермәгән: «Хатын-кыз белән җырларга кирәк, минемчә. Ир-егет белән сәхнәдә әллә ничек», «Болай икегез дә матур җырлыйсыз. Ләкин дуэт кирәкми, «не смотрится», «Рамилнең тавышы синекен каплый, Руслан. Аерым җырлагыз, дус булып калыгыз», «Үзең кебек моңлы хатын-кыз җырчы белән көтәбез!», «Ир-ат белән кирәкми-и-и дуэт, бигрәк тә сиңа, Руслан», «Тап инде берәр чибәр җырчы кыз. Күп бит алар», – дип язганнар.
Соңгы фикерләргә җавап итеп: «Айрат Сафин белән диджей Радик җырлыйлар бит әле, ике ир-егет, бик матур килеп чыга!», «Казан егетләре» җырлый ич, әнә. Зыян юк, әйбәт чыга», – дип язучылар да булган.
«Сиринә Зәйнетдинова белән җырласагыз, бик моңлы дуэт килеп чыгар дип уйлыйм», – дип тәкъдим иткән берәү.
