Руслан Кираметдинов белән Сиринә Зәйнетдиновадан яңа дуэт: «Хәния апа рухына дога булсын»
Җырчылар Хәния Фәрхи репертуарыннан «Бер җылы сүз» җырын тәкъдим итәләр.
Данлыклы һәм, ни кызганыч, инде безнең арада булмаган җырчыларның җырларын яңартып тамашачыга тәкъдим
итүче җырчылар популярлашып китте. Сиринә Зәйнетдинова белән Руслан Кираметдинов тамашачыларына Хәния Фәрхи репертуарыннан «Бер җылы сүз» җырын тәкъдим итә.
Интервьюларның күбесендә теге яки бу җырчылар, гадәттә, «Хәния апа үз җырларын башкарырга рөхсәт итә иде» дип искә ала.
Бүген, 30 май, Хәния Фәрхигә 63 яшь тулган булыр иде. Җырның премьерасы да шушы көнгә туры килгән. «Әлеге җыр Хәния апаның рухына дога булып ирешсен. Аның репертуарыннан җыр алу җиңелләрдән түгел, бу эш зур җаваплылык таләп итә. Шулай да, безнеңчә, Хәния апа үзе исән булса, җырның бу вариантын тыңлап, бары тик мактау сүзләрен генә әйтер иде», – ди җырчылар.
Җырның авторлары: сүзләре Наҗар Нәҗминеке, көй авторы – Ризван Хәкимов.