29 майда чыгарылыш сыйныф укучылары рус теленнән БДИ тапшырачак. Татарстан Мәгариф һәм фән министрлыгы кыскача аңлатма әзерләгән.
Рус теленнән БДИга 210 минут бирелә, бу – 3 сәгать 30 минут.
БДИда 27 бирем бар. Берсе – күләмле җавап кирәк булганы – сочинение, калганнары – кыска.
Беренчел һәм тест баллары.
Рус теленнән БДИ биремнәре кыска җавап белән 1 яки 3 балл дип бәяләнә (мондый 2 сорау гына). Беренче өлеш өчен иң күбе – 30 балл. Язма өчен берьюлы 24 балл алырга мөмкин. Бу – беренчел баллар була да инде. Эшкә иң күбе 54 балл алырга мөмкин. Аннары бу баллар 100 баллы шкалага күчерелә. Шкала үзгәрә, ләкин, һәрхәлдә, иншасыз 60-65 балл алып булмаячак.
Аттестатка минималь 24 тест баллы кирәк.
Югары уку йортына документлар бирү өчен минималь баллар – 36. Мәгариф һәм фән министрлыгының югары уку йортларына – 40 балл. Сәламәтлек саклау министрлыгының югары уку йортларына – 36 һәм югарырак.
Ноль балл булмасын өчен, иншада ничә хата ясарга мөмкин?
- Орфография – 4 хатадан артык түгел.
- Пунктуация – 4 хатадан артык түгел.
- Грамматика – 2 хатадан артык түгел.
- Сөйләм нормалары – 3 хатадан артык түгел.
- Этик нормалар – хәтта 1 хата да ярамый.
- Фактик хаталар – хәтта 1 хата да ярамый.