Җырчы Рузилә Хәйретдинова үзенең туган көнендә әти-әнисенә бик зур бүләк ясаган – аларны Берләшкән Гарәп Әмирлекләренә ялга алып барган. Рузилә үзенең гомер бәйрәмен кызы һәм әти-әнисе белән бергәләп, матур урыннарда бәйрәм иткән. Барлык чыгымнарны үзе күтәрүгә карамастан, әти-әнисен бу сәяхәткә ризалаштыру җиңелләрдән булмаган. Аеруча аңа самолетта очарга курыккан әтисен күндерүе кыен булган.
«Хыялымны чынга ашырдым. Бик авыр булса да, әти-әниемне ялга алып бара алдым.
Аллаһка шөкер, бик канәгать калдылар. Минзәләгә кайтып киткәч кенә нинди «оҗмах»та булганлыкларын аңлаганнар. Үзләре шулай дип әйтте.
Әлеге сәяхәт безне тагын да якынайтты. Әти-әниләрегезне кадерләгез һәм ешрак шатландырыгыз. Алардан да якынрак бер кешебез дә юк. Барыбызның да әти-әниләре сау-сәламәт булсын», – дип яза Рузилә һәм истәлекле сәяхәт мизгелләре белән сәхифәсендә уртаклаша.
Фото: © Рузилә Хәйретдинованың социаль челтәрдәге сәхифәсеннән
Фото: © Рузилә Хәйретдинованың социаль челтәрдәге сәхифәсеннән