Руль артында йоклап киткән: Татарстанда юл-транспорт һәлакәтендә ике кеше гомере өзелгән

Бүген Питрәч районында коточкыч юл-транспорт һәлакәтендә 2 ир-атның гомере өзелгән. Бу хакта «Челнинские известия» яза.

Дәүләт автоинспекциясенең беренчел мәгълүматлары буенча, «BMW» йөртүчесе арыган хәлдә руль артында була һәм йоклап китә. Ул каршы якка чыга һәм «ВАЗ» автомобиле белән бәрелешә. «ВАЗ» металл өеменә әверелгән.

Юл-транспорт һәлакәте нәтиҗәсендә «ВАЗ» автомобиленең 40 яшьлек йөртүчесе һәм 35 яшьлек пассажиры алган җәрәхәтләрдән урында ук үлгән.

Дәүләт автоинспекциясе хезмәткәрләре юл-транспорт һәлакәте шартларын ачыклый. Шулай ук вакыйга урынына Питрәч районы прокуроры урынбасары килгән.